成件事要由一位舊同事喺WhatsApp group吹雞買月餅講起。
「我識人做酒店，折上折，15號前半價，有冇人要買畀親戚朋友？」
其中一位女同事答：「我冇親戚㗎喎！反晒面喇！」
大家好緊張問咩事？嗰位女同事話上年年頭結婚，已經同老公有共識要過下二人世界，唔急住生BB，後來社會一連串動盪，佢自己對香港冇晒信心，怕生完之後累咗個小朋友，所以更加想睇定啲，點知成班長輩親戚係咁迫佢哋。
女同事：「仲記得上年拜年，啲姨媽姑姐一人一句，呢個又話再唔生就變高齡產婦，嗰個又話係咪想個仔第日同父母有代溝，仲有啲一句掟埋嚟話唔明我諗乜，最最最火滾係有個姨媽，夠膽死板起塊面同我講女人唔生仔，點算係稱職嘅老婆呀？又話我哋養狗會對BB唔好，啲狗毛會搞到小朋友敏感，哈！我同佢一年先見得一兩次，佢好似想管埋我哋兩公婆幾時搞嘢，想我棄養隻狗，個肚係我嘅，人生係我嘅，幾時輪到佢指指點點呀？」
我喺另一間舊公司都見過差唔多嘅情景，個上司不斷問一個結咗婚幾年嘅女同事：「點解唔生小朋友？」大約兩三個月就問一次，雖然態度上係出於關心，但其實個肚係人哋嘅，唔通對方自己醒唔起要生，因為你提多兩提先記得今晚要行房咩？當中梗係有個人原因同埋取向，個女同事可能覺得太煩，終於正面回應咗一句：「因為我身體有啲毛病，問過醫生，應該唔會生㗎喇。」當時鴉雀無聲，你話幾唔好意思呢！
講返唔買月餅嗰位女同事先，佢之後同班親戚講決定生BB，成班姨媽姑姐七嘴八舌咁話：「一早就要啦！」
女同事食住個勢同佢哋講，由於間屋得一房，生完BB根本唔夠空間，兩公婆決定要換層大啲嘅樓，不過唔夠錢，希望一場親戚可以借啲錢畀佢哋，之後分期慢慢還，結果，嗰班姨媽姑姐好似突然唔識字，睇到借錢買樓嘅msg之後冇再覆，女同事再逐個打去約飲茶，話想出嚟傾下借錢買樓啲嘢，最後個個親戚都話唔得閒，自此莫講話再煩佢生BB， 連普通交流都冇，女同事話唔知以為自己患咗武肺，啲親戚主動隔離佢。
我哋聽完之後都畀晒拍手emoji，最後呢位女同事嘅結案陳詞係：「有好多人鍾意對別人嘅人生指指點點，亂比意見，因為同佢哋無關吖嘛，所以要將佢哋扯埋入嚟，要同佢哋嘅利益扯上關係，呢班只係想食花生嘅自私友就會雞飛狗走，我而家求其喺WhatsApp send個hi畀佢哋，班姨媽姑姐都腳震呀！」
呢招大絕真係可以做到一劍封喉，一招收晒皮。
whatsapp emoji 在 Whatsapp emoji meaning - Pinterest 的八卦
Smiley. Whatsapp emoji meaning - Imgur Emoji Symbols Meaning, Emoticon Meaning, Symbols And Meanings,. imgur. 4M followers. ... <看更多>